Qırımtatar Maaliy Merkezi

İşğalciler sabıq siyasiy mabüs Edem Bekirovnı qıdıruvğa ilân ettiler

22.05.2020

İşğal etilgen Qırımda sentâbrniñ 7-de Ukraina ve Rusiye arasında keçirilgen mabüsler deñişimi çerçivesinde azat etilgen Edem Bekirovnı qıdıruvğa ilân etiller. Bu aqta "Gratı" saytında haber etile.

Malümatqa köre, Bekirov sanki qaydiyetini Qırımdan Herson vilâyetiniñ Novoalekseyevka qasabasına avuştırıp, mahkemege bergen mecburiyetini bozdı.

"Aslında qabaatlav tarafınıñ mantığına köre, mahkemeden qaçmağa oña Federal havfsızlıq hızmeti yardım etti. Çünki olar onı başta Qırımdan Moskovğa alıp ketip, soñra mabüsler deñişimi çerçivesinde Kiyevge yolladılar", - dep qayd etti advokat Lagin.

2018 senesi dekabrniñ 12-de Çonğar keçiş noqtasında Rusiye sıñırcıları Ukraina vatandaşı, Herson vilâyeti Novoalekseyevka qasabasınıñ sakini, qırımtatarı Edem Bekirovnı yaqaladılar. Saba, saat 8:30 pasport teşkerüvi vaqıt toqtatılğan Bekirov aqqında aqşamğace malümat berilmedi.

Dekabrniñ 13-de Aqmescitniñ Kiyev rayon "mahkemesi" Edem Bekirovnı 2019 senesi fevralniñ 11-ne qadar apiske aldı. Dekabrniñ 20-de Rusiye Federal havfsızlıq hızmeti oñı resmiy şekilde silânı qanunsız satın aluv ve patlayıcı maddelerni qanunsız berüv, satuv, saqlav ve taşuvında qabaatladı (Ceza kodeksiniñ 222 maddeniñ 2 qısmı ve 222.1 maddeniñ 2 qısmı)

İyunniñ 11-de Avropa insan aqları mahkemesi Edem Bekirovnıñ hastahanege deral yatqızmasına dair qarar çıqardı.

İyülniñ 10-da Avropa insan aqları mahkemesi siyasiy mabüs, 1 gruppa saqatı Edem Bekirovnen bağlı yañı qararnı çıqardı. Oña köre, siyasiy mabüsni mustaqil ve ihtisaslı ekimler baqıp, hastalıqlarına köre ayrı tafsilâtlı hulâsalarnı azırlamalı.

Avgustnıñ 27-de Aqmescitniñ Merkeziy rayon "mahkemesi" siyasiy mabüs, 1 gruppa saqatı Edem Bekirovğa sıñırlama tedbirini deñiştirip, mahkemege kelmege mecburiyetnen apisten yiberdi.

Edem Bekirov Novoalekseyevka qasabasınıñ qırımtatar faallerinden biridir. O, 1 gruppa saqatı ola, onıñ bir ayağı kesilgen. 2018 senesi yanvar ayında oña ağır yürek ameliyatını keçirdiler.