Qırımtatar Maaliy Merkezi

İşğal etilgen Qırımdaki "mahkeme" nevbetteki kere İlver Ametovnı para cezasına üküm etti

12.05.2020

Salı künü, mayısnıñ 12-de, işğal etilgen Qırımdaki "mahkeme" endi dertünci kere Sudaq regional meclisiniñ reisi İlver Ametovğa para cezasını berdi. Bu sefer qırımtatar faali 150 biñ ruble tölemeli. Bu aqta Qırımıtatar Milliy Meclisi reisiniñ birinci muavini Nariman Celâl Facebook saifesinde bildirdi.

"Sudaq regional meclisiniñ reisi İlver Ametov kirişimcilik faaliyetinde bozuvlarda qabaatlanıp 150 biñ ruble para cezasına üküm etildi. Yarım yıl içinde bu endi dörtünci mahkeme. Para cezasınıñ umumiy raqamı aman-aman 275 biñ ruble teşkil etti", - denile haberde.

İlver Ametov emin ki, işğalciler akimiyeti onı siyasiy körüşler ve içtimaiy faaliyeti içün taqip ete.

2019 senesi sentâbrniñ 27-de Rusiye quvetçileri Sudaq regional meclisiniñ reisi İlver Ametovnıñ evinde ve qavehanesinde tintüvler keçirdi. Tintüvler vaqtında quvetçiler onıñ yerli meclis azası şeadetnamesi ve şahsiy müzeyinden antika eşyalarnı, şu cümleden 1833-1933 seneleri yasalğan 4 süngü pıçaqnı tutıp aldılar. 

2019 senesi noyabrniñ 7-de işğal etilgen Qırımdaki Sudaqnıñ sulh "mahkemesi" Sudaq regional meclisiniñ reisi İlver Ametovğa 300 ruble para cezasını berdi.