Qırımtatar Maaliy Merkezi

İşğal etilgen Qırımda 2020 senesiniñ I kvartalında 15 tintüv qayd etildi – Qırımtatar Maaliy Merkezi

11.05.2020

2020 senesiniñ I kvartalında işğal etilgen Qırımda 15 tintüv qayd etildi. Olarnıñ arasında 12-si qırımtatarlarnıñ evlerinde ötkerildi. Bu yıl bıltırğa köre tintüvlerniñ sayısı azlaştı. 2019 senesiniñ birinci kvartalında Qırımtatar Maaliy Merkezi 45 tintüvni qayd etken edi. Lâkin insanlarnı siyasiy ve diniy sebeplerden takip etüv meyili Qırım işğal etilgenden başlap, bugünki küngece deñişmey. Bu aqta Qırımtatar Maaliy Merkezi azırlağan 2020 senesiniñ I kvartalında işğal etilgen Qırımda insan aqlarnı bozuvlarnıñ talilinde bildirile.

На изображении может находиться: один или несколько человек, люди стоят и на улице

Teşkilâtnıñ malümatına köre, yanvar ayında yañı tintüvler qayd etilmedi. Fevralde quvetçiler "Yehova şaatları davası" boyunca bir tintüv ve Keriçteki oquv yurtlarında terakt azırlavında şübelengen eki ösmürniñ evlerinde tintüvler keçirdiler. Esabat devri içinde çoqusı tintüvler, bıltır kibi, mart ayında kayd etildi. Olarnıñ arasında sekiz tintüv "Hizb ut-Tahrir davası" ve biri – sanki Noman Çelebicihan adına batalyonda iştirak etüvnen bağlı. Bundan ğayrı mart ayında işğalciler daa eki tintüvni qırımtatarlarnıñ evlerinde - 67 yaşında qadın ve 26 yaşında erkek kişide ötkerdiler.

Quvetçiler tintüvler keçirgen vaqıt sıq-sıq insan aqlarını bozalar. Hususan mal-mülkni bozuv, tintüvni ev saibi evde olmağan vaqıt keçirüv ya da yasaq etilgen kitaplarnı ketirip taşlav qayd etildi.

2020 senesiniñ I kvartalında işğal etilgen Qırımda insan aqlarnı bozuvlarnıñ talilinen tanışmaq

Hatırlatamız ki, Rusiye Qırımnı işğal etken soñ tintüvler yarımadada muntazam tarzda ötkerile. Bu areketler Rusiyeniñ siyasetine qarşı çıqqan insanlarnı qorquzmaq içün yapıla. Qırımtatar Maaliy Merkeziniñ malümatına köre, 2019 senesi işğal etilgen Qırımda 86 tintüv, olarnıñ arasında 64 – qırımtatarlarnıñ evlerinde ötkerildi. Bu köstergiç 2018 senesi ötkerilgen tintüvlerniñ sayısına yaqın olıp (92), 2017 senesi raqamını bayağı aştı (62).