Qırımtatar Maaliy Merkezi

"Çonğar" keçiş noqtasında memuriy sıñırnıñ keçmesini oñaytlı etmek içün hab açılacaq

06.05.2020

Salı künü, mayısnıñ 5-de, "Çonğar" keçiş noqtasında işğal etilgen Qırım ile memuriy sıñırnıñ keçmesini oñaytlı etmek içün hab açılmasına dair memorandum imzalandı. Bu aqta Ukrainanıñ vaqtınca işğal etilgen topraqlarnıñ reintegratsiya nazirliginiñ matbuat hızmeti bildirdi.

Memorandumnı Ukrainanıñ vaqtınca işğal etilgen topraqlarnıñ reintegratsiya naziri Aleksey Reznikov, Ukraina astaypı naziri Vladislav Krikliy, Herson vilâyetinde devlet memuriyetiniñ reisi Yuriy Gusev, "Ukraina demir yolu" şirketiniñ baş müdiri İvan Yurik ve "Sokar Enerci Ukraina" şirketiniñ vekili Sergey Kolençenko imzaladılar.

"Keçiş noqtaları insanlar içün oñaytlı ve faydalı olmalı. Devlet memuriyetiniñ niyeti, yatırımcı "Sokar" şirketiniñ yardım bermege istegi, "Ukraina demir yolu" tarafından qoltutuv ve ilerideki işniñ temelini qoyğan Ukraina astaypı nazirligi işiniñ büyük qısmı bar. Çonğarda keçiş noqtasınıñ yañartuvı – ilerideki işniñ tek birinci adımıdır", - dep qayd etti Aleksey Reznikov.

Herson vilâyetinde devlet memuriyetiniñ reisi Yuriy Gusevniñ sözlerine köre, "Çonğar" keçiş noqtasında hab, insanlarnıñ işğal etilgen Qırım ile memuriy sıñırnı keçkende, yoldan raatlanması ve qoşumça hızmetlerden faydalanması içün açıla.