Qırımtatar Maaliy Merkezi

Siyasiy mabüslerge qorçalav vastalarnı öz esabına satın almağa teklif ettiler

06.05.2020

Rusiye Federal cezanı icra etüv hızmetiniñ tibbiy sanitar bölüginiñ başı Aleksandr Paçganov, Qırım siyasiy mabüsleri koronavirus qırğınlığı şaraitte korçalav vastalarnı öz esabına hızmetiniñ tükânlarında satın almalı, dep bildirdi. Bu aqta "Qırım birdemligi" birleşmesi haber etti.

"Mabüslerniñ sağlıq qoruvı aqlarını teminlemek maqsadınen olarğa taqiqiy odalarğa, taqiqiy areketlerge ve mahkeme oturışlarına alıp barılğanları vaqıt şahsiy qorçalav vastaları (maskalar, qolçaqlar) ve antiseptiklerni Rusiye Federal cezanı icra etüv hızmeti "Kalujskoye" şirketiniñ tükânlarında satın almağa imkân berile", - dep yazdı Paçganov.

Onıñ sözlerine köre, koronavirus qırğınlığı vaziyetinde taqiqat tevkifhanelerinde mabüsler öz imayeci, adliyeci ve başqa şahıslarnen tek qısqa devamlı körüşüvler odalarında cam arqasından körüşe bileler. İstisna olaraq kelgenlerniñ arizalarına binayen körüşüvlerni taqiqiy odalarda şahsiy qorçalav vastalarnı qullanıp ötkermege imkân berile.