Qırımtatar Maaliy Merkezi

Rusiye Azaq deñizinde Ukrainağa qarşı iqtisadiy cenkni devam ete

04.05.2020

2020 senesi mart ayında Rusiye tarafından Qara deñizden Azaq deñizindeki Ukraina limanlarına yaldap ketken gemiler tutuvınıñ ortalama devamlılığı 31 saat teşkil etti. Bu aqta "Qara deñiz strategik araştıruv institutı" közetüv taqımınıñ yolbaşçısı, BlackSeaNews saytınıñ baş muarriri Andrey Klimenko Facebooktaki saifesinde bildirdi.

"Qara deñiz strategik araştıruv institutınıñ" közetüv taqımı, BlackSeaNews ve "Tış işler Maydanı" muarririyetleri Rusiyeniñ Azaq deñizinde Ukrainağa qarşı iqtisadiy cenki boyunca aylıq araştıruvını aydınlattı.

2020 senesi mart ayında Rusiye tarafından Qara deñizden Azaq deñizindeki Mariupol ve Berdânsk Ukraina limanlarına yaldap ketken gemiler tutuvınıñ ortalama devamlılığı 31 saat, Mariupol ve Berdânsktan çıqqan ihracat yükünen gemiler tutuvınıñ ortalama devamlılığı 34,7 saat teşkil etti.

"Közetüv taqımı azalarınıñ fikrince, 2020 senesi aprel ve mayıs aylarda vaziyet fenalaşa bile, çünki Ukraina prezidenti aprelniñ 11-de Azaq deñizinde gemiler qatnavınıñ qorçalavı maqsadınen qurulğan "Vostok" arbiy deñiz bazasını teşkerip baqmaq içün Berdânsk limanını ziyaret etken soñ Rusiye cevap olaraq faaleşmek mümkün", - denile haberde.