Qırımtatar Maaliy Merkezi

Qırım sakinleri Ukrainanıñ qıta qısmına keçip olamaylar

02.05.2020

Cuma künü, mayısnıñ birinde, Ukraina sıñırcıları 11 Qırım sakinini humanitar ihtiyacı olğanına baqmadan Ukrainanıñ qıta qısmına yibermege red ettiler. Soñra 3 insannı sıñırdan keçirdiler, qalğanları ise işğal etilgen yarımadağa qaytmağa mecbur oldı. Bu aqta faal Mihail Batrak Facebooktaki saifesinde haber etti.

Faalniñ malümatına köre, "Çaplinka" keçiş noqtasında Ukrainanıñ qıta qısmına ağırayaqlı apayına ketken Nariman Aliyevni yibermey ediler. "Kalançak" keçiş noqtasında daa 10 Qırımda qayd etilgen Ukraina vatandaşını sıñırda toqtattılar.

"Tünevin "Çaplinka" keçiş noqtasında niayet Nariman Aliyevni Ukrainanıñ qıta qısmına yiberdiler. "Kalançak" keçiş noqtasında daa eki Qırım sakinine sıñırnı keçmege ruhset berdiler. Qalğanlarını yibermege red ettiler, olar işğal etilgen yarımadağa qayttılar", - haber etti faal.