Qırımtatar Maaliy Merkezi

Qırımtatar faallerine "aktsiyalar keçirilmemesi" aqqında tenbiler ketirmege devam eteler

01.05.2020

İşğal etilgen Qırımda qırımtatar faalleri Rusiye nezareti altında olğan Qırım "akimiyetinden" maysnıñ 3-den iyunnıñ 26-ce ruhsetsiz aktsiyalar, şu cümleden miting, numayış ve yürüşler ötkerilmemesi aqqında "tenbi vesiqalarını" almağa devam eteler. Bu aqta "Qırım birdemligi" birleşmesi haber etti.

Bu sefer "polis" hadimleri siyasiy mabüs Emir-Usein Kukunıñ ömür arqadaşı Meryem Kuku ve adliyeci Ruslan Abduraşitovğa "tenbi vesiqalarını" ketirip oqudılar.

"Soñra olar künlerni belgilediler: mayısnıñ 3, 9, 18 ve iyunnıñ 26-sı. "Şu bayram künleri", - dedi polis hadimi. "Ya bu nasıl bayram künleri?", - dedim men. "Men bilmeyim, mında öyle yazılğan. Biz tek sizni tenbilep, şu künleri ruhsetsiz yürüşlerge qoşulmaycağıñız aqqında imzañıznı almalımız", - dep ayttı polis hadimi", - tarif etti Meryem Kuku.

Ruslan Abduraşitovğa adliyeci olaraq çalışıp, qırımtatarlarnı memuriy davalarda imaye etkeni içün "tenbi vesiqasını" ketirdiler.