Qırımtatar Maaliy Merkezi

Mültimedia

‘Maña babamnı qaytarıñız!’-QRM-niñ yañı vesiqalı filmniñ treyleri

20.09.2021

2014 senesine qadar Qırım farqlı millet ve din mensüpleri içün acayip bir yer edi. Lãkin RF tarafından Qırım işğal etilgen soñ her şey deñişti. Repressiya, basqı, tutuqlamalar- şimdiki zamannıñ kerçekleridir ki, neticede, tek büyükler degil de, balalar da azap çekmekteler.

Siyasiy sebeplerden dolayı Qırımda azatlıqtan mahrum qaldırılğan insanlarnıñ sayısı kün-künden artmaqta. 200-den ziyade bala babalarsız, olarnıñ herkünlik diqqat ve desteksiz qalmaqta. QRM taqımı  işğal etilgen Qırımda  her bala eñ yaqın zamanda öz babasına qavuşması ve aydın balalığınıñ her kününe sevinmesi içün  elinden kelgenini yapmaqta.

 Bu maqsatqa yetmek içün QRM ‘Maña babamnı qaytarıñız!’ adlı qısqa vesiqalı filmni çıqarmağa qarar berdi.

 Mezkür filmde Qırım işğalinden soñ babaları zorbalıq ile qaçırılğan ve hapiske alınğan balalarınıñ taqdir hikãyelerini topladıq. Bazıları babalarınıñ tutuqlanmasını körip, şimdi bir arzu ile yaşamaqtalar: ‘Maña babamnı qaytarıñız!’

Mezkür film ile ukrain ve halqara cemaatçılıqnıñ diqqatını siyasiy mahbüsler meselesine, olarnıñ balalarına çekmek ister edik.

 Film premyerası eñ yaqın zamanda olacaq, şimdilik ise haberlerimizni taqip etiñiz.

 Hatırlatamız ki, QRM bu saada sistemli çalışmaqta. 2017 senesi QRM siyasiy mahbüsler, ğayıp olunğan ve qaçırılğanlarnıñ balaları arasında ‘Babam- qaramandır’ adlı yarışnı keçirgen edi. Balalar öz ana-babaları, duyğu, asret acıları haqqında hikãye ettiler. Yarış ğalipleri noutbuk ve planşetlernen taqdirlenilecek. Faqat yarışta iştirak etken her bir bala diqqat ve bahşışsız qalmaz.