Qırımtatar Maaliy Merkezi
+38 (067) 343 74 54   +38 (044) 489 61 25

Mültimedia

Korotkih BMT(OON)da qırımtatar qadınlarınıñ vaziyetini añlattı

07.07.2022

Çarşenbe künü, 6 iyülde Qırımtatar resurs merkeziniñ meneceri Lüdmila Korotkih  BMT(OON) tamır halqlarnıñ haqları boyunca Ekspert mehanizmniñ toplaşuvında iştirak etti. Çıqışında Korotkih  qırımtatar qadınları tek Qırımda degil de, yañı  işğal etilgen topraqlarda da rusiye şiddetiniñ qurbanları olğanını qayd etti.

Çıqış metini

 Eñ-evelã BMT(OON) tamır halqlar içün göñülli yardım Fonduna bu sessiyada iştirak etmek imkãnı içün minnetdarlıq bildirem.

Tamır halqlar temsilcileri olğan qadınlar insan haqlarını bozuvları, cenk şaraitinde şiddet telükesi altında bulunmaqtalar, bu da içtimaiy, siyasiy ve iqtisadiy qorumasızlıqnı  kerginleştire. İnsan haqlarınen bağlı vaziyetniñ fenalaşması, antiterroristik ve sıñırlama qanunları tamır halqlarnı temsil etken qadınlarnıñ sesini bastıra. Avtoritarizm, tanımamazlıq neticesinde qadın-qızlar öz şahsiy ve kollektiv haqlarını qorumaq ğayretleri içün taqip etilmekteler. Sahte qabaatlama, qorquzmalar da bularğa ait.

 Tünevin rusiye federatsıyasınıñ tamır halqlarnı temsil etken qadınlarğa nisbeten munasebetiniñ şaatı oldıñız. Böyle areketlerni takbih etken tamır halqlar temsilcileri ve diger ülkelerge minnetdarlıq bildirem.

Qırım işğali devamında yarımadada 12 qadın elãk oldı, olardan 3 qırımtatar. 82 yaşında olğan Veciye Kaşkanıñ, onı tutuqlamaq istenilgende can bergeni- sahte huquqqoruyıcılarnıñ qırımtatar qadınlarına qaşrı basqınıñ deşetli misalidir.

 Advokat Emine Avamileva ağımdaki sene 5 mayısta öz vazifesini becergen vaqıtta 5 künge idariy hapiske alındı.

Rusiye Ukrainağa qarşı cenk başlatqan soñ yañı işğal etilgen Herson ve Zaporojye vilãyetlerinde qırımtatar qadınları taqip qurbanları oldılar. 4 qırımtatar qadın zorbalıqnen qaçırıldı.

 Qırımtatar qadınları adet üzre siyasiy hayatta faal iştirak etip kelgenler. Böyle etip, Milliy Meclis yasaq etilgeninden ve Qırımda işğalcı hakimiyetniñ areketlerinden dolayı öz temsilcilik vazifelerini amelge keçirmesinde bayağı sıñırlandılar. Aksiy alda, Qırım yarımadasında böyle faaliyet sebebinden ekstremist teşkilãtnıñ faaliyetinde iştiragında qabaatlanmaq ve memuriy mesuliyetke çağırılmaq mümkün.

 Bundan dolayı Rusiyeden qırımtatar qadın-qızlarğa qarşı diskriminatsıya ve basqını ve işğal etilgen territoriyalarda bütün tamır halqlar temsilcileriniñ taqibini toqtatmağa talap etemiz.

 Ekspert mehanizmge  qadınlarnıñ dünya inkişafındaki iştiragı, barışıq añlaşmalarında rolü kibi meselelerini ögrenmege ve tamır halqlarnı temsil etken ve taqip etilgen qadınlarnıñ qoruv usullarını işlep çıqarmağa tevsiye etemiz.