Qırımtatar Maaliy Merkezi

Mültimedia

İşğalcılar Qırımnıñ tamır halqına nisbeten repressiyalarını devam etmekteler-Bariyev

21.05.2021

Qırımtatar resurs merkeziniñ reisi, qırımtatar Meclisi çetel işler ve huquq meseleleri boyunca idaresiniñ başı Eskender Bariyev ‘UA:Qırım’ telekanalğa intervyu bergende  Qırımda insan haqlarını bozuvlarınen bağlı vaziyetinen izaatladı ve RF Qırımnıñ tamır halqına nisbeten repressiyalarını devam etkenini bildirdi.

QRM reisi intervyu devamında Qırımda 2021 senesiniñ ilk çeriginde yüz bergen insan haqlarını bozuvlarınıñ talilini taqdim etti. Teşkilãtnıñ malümatlarına köre, mezkür vaqıt içerisinde 22 tintüv, 146 yaqalama, 23 sorğu keçirilgen edi. Yılnıñ ilk üç ayında umumen 45 adam hapiske alındı: 10-yañı, 16-müddetni uzatuv, 19-mahkeme hükümi. Adaletli mahkeme haqqınıñ bozuvı 113 kere yüz bergen edi.  Fizik ve psihik sağlığına dair haqlarnıñ bozulması 51 kere qayd etildi. Şundan da ğayrı, 33 kere siyasiy mabuslar Qırımda başqa yerlerğe alıp ketildi.

‘Yaqın zamanda talilimiz ingliz tiline çevirilip, elçiliklerge yollanılacaq. Halqara cemaatçılıq işğal etilgen Qırımda neler olıp keçkeninden haberdar olmalılar. İşğalcılar Qırımnıñ tamır halqına ve ukrain tarafdarları olğan faal cemaatçılarğa nisbeten repressiyalarnı devam eteler’,- qayd etti o.