Qırımtatar Maaliy Merkezi

Mültimedia

‘Qırımnı RF vatandaşlarınen toldurılmasına musaade etmemelimiz’,- Bariyev

12.04.2021

Qırımtatar resurs merkeziniñ reisi, qırımtatar Meclisi çetel işler ve huquq meseleleri boyunca idaresiniñ başı Eskender Bariyev  ‘UA:Qırım’ telekanalına berilgen intervyu devamında Ukraina prezidenti ofisiniñ reis muavini İgor Jovkvınıñ Ukraina işğalden soñra Qırımğa köçip kelgen rusiyelilerni sürgün etmeycegi haqqında beyanatını izaat etti. Ekspertniñ fikrine köre, memurlarnıñ böyle kibi beyanatları işğalcılarğa yarımadanıñ ealisini deñiştirmek ğayretlerini arttırmağa yol aça.

‘Bugünde bugün memurlarımız rusiyeliler, işğalcılarğa Qırım ealisini deñiştirmek içün siltem bereler. Bir de bir agressor diger topraqlarnı zapt etkende eñ-evelã  şu topraqlarnıñ ealisi yerine öz adamlarını yerleştirmege tırışa. Böyle etip, Ukrainanı ve qırımtatarlarnı tanımağan, farqlı tüşüngen sakinler temelleşe,’- dedi o.

Şundan da ğayrı, Bariyev mezkür meseleniñ huquqiy tarafına celp etti. RF işğal etilgen Qırım topraqlarına rusiyelilerni yerleştirerek, gumanitar haqlarnen bağlı olğan IV Jeneva konventsıyasını ve ukrain qanuncılığını da bozmaqta.

 ‘Biz Qırımnı RF vatandaşlarınen toldurılmasına musaade etmemelimiz. Yoqsa işğalden soñra bile elimizge Qırım bir topraq olaraq degil de, ukrain devletine havflı bir yer, kergin mühitli Qırımnı elge alacaqmız,’- urğuladı ekspert.