Qırımtatar Maaliy Merkezi

Mültimedia

Bariyev: biz işğalciniñ uquqsız areketleri aqqında halqara cemaatçılıqqa faal malümat bermelimiz

18.02.2021

Qırımtatar Maaliy Merkezi idaresiniñ yolbaşçısı, Qırımtatar Milliy Meclisiniñ uquqiy meseleleri ve tış işleri idaresiniñ başlığı Eskender Bariyev "PravdaTut" kanalına bergen intervyüsinde ğarbiy memleketler RF-ke qarşı sanktsiyalarnı uzatsın ve quvetleştirsin desek, Ukraina işğalciniñ uquqsız areketleri aqqında halqara cemaatçılıqqa faal malümat bermek kerek dep bildirdi.

"Ekspertlerniñ çoqusı AB RF-ke qarşı sanktsiyalarnı eki yıldan ziyade uzatmaz der ediler. Lâkin endi 7 yılğa qadar vaqıt  keçti, sanktsiyalar ise devam eteler ve bu al – bizim diplomatik korpusı işimizniñ neticesidir. Elbet, ziyadece basım köstermege ister edik, lâkin añlamaq kerekmiz ki, Rusiye Federatsiyasınıñ biznesi dünyaviy iqtisadiyatqa teren integratsiya olunğanı içün, ğarbiy memleketlerniñ iqtisadiyatı da rusiyeniñkine o qadar bağlıdır", - dedi o.

Bariyevniñ añlatqanına köre, bütün bu sanktsiyalarnıñ uzatuvınen bağlı protsessler - sade bir şey degildir, çünki olar episi bir de bir memleketlerniñ iqtisadiyatına tesir etmekte. Şunıñ içün Ukraina, sanktsiyalarnıñ uzatuvı ve quvetleştirilüvi içün, işğalciniñ yarımadadaki  uquqsız areketleri aqqında halqara cemaatçılıqqa faal malümat bermek lâzimdir, dep  qayd etti ekspert.