Qırımtatar Maaliy Merkezi

Mültimedia

İşğal olunğan Qırımda sistemli aileviy taqiplerge yüz berile - Bariyev

14.01.2021

Qırımtatar Maaliy Merkezi idaresiniñ yolbaşçısı, Qırımtatar Milliy Meclisniñ azası Eskender Bariyev "UA:Krim" telekanalınıñ efirinde Qarasuv "Hizb ut-Tahrir işi" iştirakçilerine çıqarılğan qararlarını tefsir eterek, Qırımda sistemli aileviy taqiplerge yüz berilgeni, yani  em baba,em oğul, em de kiyev apiske alınuvı  aqqında haber etti.

"Biz, sistemli aileviy taqiplerniñ peyda oluvı tendentsiyalarnı köremiz. Eger biz bir, Ömerovnıñ qorantasını alsaq, mında Enver Ömerov, onıñ oğlu – Riza ve onıñ kiyevi aqqında laf kete. Bir, Fatime qadınnıñ yanından babası, ağası ve aqayını aldılar, yani yaqaladılar. Bu aileniñ faciyası bütün halqqa alâqası bar. Ve böyle adiselerni biz başqa "davalar" boyunca yaqalanğanlarda da köremiz", - dep  iza etti o.

Bariyev, siyasiy mabüslarnıñ iç birisinde silâ, patlaycı maddeler, terroristik faaliyetiniñ bir de bir delillerini tapmağanlarını ayrıca qayd etti. Bu "davalarnıñ" esasını diniy , siyasiy mevzuları boyunca tüşünceler, subetler teşkil eteler.  Şu zaman, işğalcilerniñ özleri ise çoq faal şekilde diñleyici apparatlarnıñ vastasınen camilerdeki, evlerdeki laflarnı diñlep, insanlarnıñ şahsiy ömürlerine kirişeler. 

"Enver Ömerov özüniñ  soñ sözünde   qayd etkenine köre, oña qarşı sahte iş açqan tahqikatçı bile ondan afu soradı ve, men bellesem, Enver Ömerov kibi insan yalan aytmaz", - dep ilâve etti ekspert