Qırımtatar faal cemaatçılarnıñ tintüv ve tutuqlamaları munasebetinen QRM beyanatı

August 12, 2022

Cumaaqşamı künü, 11 avgustta rusiye silãhlı küçler Canköy rayonında 6 qırımtatar evinde tintüv keçirdiler.

Tintüvler:

1. Enver Kroş

2. Vilen Temeryanov

3. Seitiya Abbozov

4. Murat Mustafayev

5. Edem Bekirov

6. Rinat Aliyev

Tintüvler saba saat 4 başlanıldı, advokatlar tintüv yerine kirsetilmedi.

 6 adamnıñ hepisi tutuqlanıldı. Hepisi de terroristik teşkilãtında iştirak etkenlerinde qabaatlanalar.

 12 avgust künü 2022 senesi Aqmescitteki Kiyev mahkemesi  Enver Kroş, Vilen Temeryanov, Murat Mustafayev, Edem Bekirov, Rinat Aliyevni 2022 senesi 10 oktãbrge qadar hapiske mahküm etti. Seitiya Abbozov aynı müddetke ev hapisinde bulanacaq.

Ceza qararı alınğanda mahkeme toplaşuvına diñleyici ve tutuqlanğanlarnıñ tuvğanları kirsetilmedi.

 Enver Kroş 2015 senesi Canköy polis mağazında elektriknen işkencege oğratılğan edi. 2018 senesi ise memuriy yaqalandı.  Vilen Temeryanov da evelden tutuqlanğan, cezağa oğratılğan ve memuriy yaqalanğan edi. Seytiya Abbozov, Murat Mustafayev, Edem Bekirov, Rinat Aliyev mahkeme toplaşuvlarına muntazam şekilde kelip, qırım siyasiy mahbüslerniñ desteklegen tedbirlerde iştirak ete ediler. Böyle kibi areketler qırımtatar faal cemaatçıları mahsus taqip olunğanlarını isbatlay.

 Qırımtatar Resurs Merkezi rusiye silãhlı küçleriniñ areketlerini takbih ete. RF siyaseti işğal etilgen Qırımdaki insanlarnıñ söz serbestligi, din ve siyasiy noqtainazarlarına qarşı küreşkenlerini numayiş ete.

RF öz qanunlarını siyasiy menfaatlarına qullana, ayrıca qırımtatar ve ukrainlerniñ Qırım işğaline qarşı şiddetsiz küreşini bastırmaq maqsadınen işlete.

QRM işğal etilgen Qırım territoriyasında yaqalanğan bütün siyasiy mahbüslerini eñ yaqın zamanda azat etmekni talap ete.

QRM halqara cemiyetni RF ve Qırım işğalcı hakimiyetke qarşı basqını qattılaştırmaq ve böyle etip, siyasiy taqiplerini toqtatmağa, şundan da ğayrı,  işğal etilgen Qırımda insan haqlarınıñ  bozulmasına ait olğan şahıslarğa qarşı sanktsıyalar kirsetmege çağıra.