Ukraina etnocemiyetleri cenk şaraitinde faaliyetini muzakere ettiler

July 22, 2022

Cumaaqşamı künü, iyülniñ 21-inde Ukraina medeniyet ve informatsıya siyaseti Nazirliginde Ukraina etnocemiyetlerinen körüşüv keçirildi. Cemiyetler Ukraina terrritoriyasınıñ bütünligini tiklenilmesinen öz birdemligini bildirdiler.

Körüşüv devamında iştirakçiler Rusiyeniñ Ukrainada başlatılğan cenkke qarşılıq köstermekte birdemlikniñ mühimligi qayd etildi. Ukrainanıñ çeşit etnocemiyetleriniñ temsilcileri çeşit saalarda küreşke qoşulalar: biri qoluna silãh ala, başqaları dünyanı Rusiyeniñ Ukrainağa ahlãqsız ücümi haqqında haberdar ete, digerleri gumanitar yardımnı teşkil ete.

‘ Ukraina yahşı niyetli, medeniy farqlılıqlarnı ürmet etken insanlarnı sıcaq bir mühitte qarşılamağa hazır olğanını numayış etti. Ayrıca da, Ukrainanıñ bütün etnocemiyetlerniñ rusiye şiddetine qarşılıq köstergenlerinde birligini kördik’,- dep qayd etti Yelena Bogdan.

Onıñ aytqanına köre, Ukraina özünden farqlı olğan her hangi etno toplumnı tanıdı ve ülkedeki etnik çeşitligini teşkil etken bu toplumlarınıñ inkişaf etmege ğayret ete edi.

QRM reisi Eskender Baryev yaqın zamnada Cemiyet şurası keçirecek konsultatsıyalar haqqında bilgi berdi.

‘Biz berabermiz. Çeşit etnik toplumlarnıñ temsilcileri olaraq hep birlikte devletimiz içün küreşmektemiz, birlikte huquqiy devletimizni qurmaqtamız,’- qayd etti o.