Üçünci Bağçasaray ‘Hizb ut-Tahrir davası’nıñ iştirakçilerine dair çıqarılğan qarar munasebeti ile QRM beyanatı

November 2, 2021

2021 senesi oktãbrniñ 29-ında Rostov-na-Donu arbiy mahkeme 2020 senesi 11 martta tutuqlanğan üçünci Bağçasaray ‘Hizb ut-Tahrir davası’nıñ iştirakçilerine dair qarar çıqardı.

Seytumer Seytumerov 17 yıl, Osman Seytumerov 14 yıl, Rustem Seytmemetov 13 yıl, Amet Suleymanov 12 yıl hapis cezasına mahküm olundılar.

 Olar hepisi ‘terrorist teşkilãtnıñ faaliyetinde iştirak’ etkenlerinde qabaatlanalar.

Mezkür dava boyunca qabaatlamalar ‘gizli şaatlar’nıñ bergen malümatlarğa, rusiye silãhlı küçlerinen işbirlikte bulunğan ekspertlerniñ qararlarına esaslana. Davanıñ ketişatı halqara qanunlarnıñ bozulmasınen olıp keçe. Qabaatlanğanlar serbestlik haqqı ve şahsiy toqumamazlıq haqqı, adaletli mahkeme, huquq qorulmasında, şahsiy hayatlarına hürmet, fikir, vicdan, din, noqta-i nazarlarını bildirüv serbestligi haqqlarında sıñırlanıldı, insaniyetsiz, insan menligini ıncıtqan munasebetke oğratılğan ediler. Mezkür ‘dava’ çerçivesinde qanun boyunca cezalanmaq haqqı da bozulğan edi, çünki RF işğalcı devlet olaraq IV Jeneva konventsıyasına binaen işğal etilgen Qırım territoriyasında öz ceza qanunlarını işletip olamay.

QRM qatiyen itiraz bildirip, mezkür mahkeme hükmü qanunsız, cinayetli olğanını bildire.

RF-nıñ böyle siyaseti işğal etilgen Qırımdaki insanlarnıñ diniy, siyasiy mevamları ile davanı numayış ete. Şundan da ğayrı, Rostov-na-Donu Cenübiy arbiy mahkemesiniñ qararı qırımtatarlarğa qarşı repressiyalar ve basqılar devam etkenini tasdiqlay.

 RF öz qanunlarını haqsız şekilde siyasiy maqsat ile, ayrıca qırımtatarlarnıñ Qırım işğaline qarşılığını, zorbalıqsız küreşini bastırmaq maqsadınen qullanmaqta.

 QRM üçünci Bağçasaray ‘Hizb ut-Tahrir davası’nıñ iştirakçilerine dair mahkeme hükmüni lãğu etmege ve siyasiy mahbüslerni azat etmege çağıra.

 QRM qayd etkenine köre, Ukraina yolbaşçılığı Qırım Muhtar Cumhuriyeti ve Aqyar şeherini azat etmek oğrunda faaliyetini quvetleştirmeli.

 QRM halqara cemaatçılıqnı, eñ-evelã da Qırım Platformasınıñ iştirakçileri olğan devletlerni RF-na basqını arttırmaq, Qırımda insan haqlarını bozuvda mesuliyetli şahıslarğa nisbeten şahsiy sanktsıyalarnı kirsetmek, ‘Severnıy potok-2’ gaz keçitini çalıştırttmamağa çağıra.

QRM bugünki ‘mahkeme hükümleri’ Ukraina ittifaqdaşları olğan ülkeler RF qarşı keregi qadar qattı turmağanları sebebinden yüz bergenine emin.