Qırımtatar Maaliy Merkezi

Qurmandaki «Hizb ut-Tahrir» davasınıñ iştirakçilerine çıqarılğan ükümler munasebetinen QMM beyanatı

Бoş aynıñ 3-de Rostov-na-Donu şeerindeki Cenübiy okrugınıñ arbiy mahkemesi sözde Qurmandaki «Hizb ut-Tahrir davasınıñ» iştirakçilerine ükümlerini çıqardı.

Rustem Emirüseinov Rusiye Ceza kodeksiniñ 205.5 maddesiniñ 1-inci qısımına binaen qabaatlanıp, 17 yılğa azatlıqtan marum etildi. 2 yıl apishanede ve 15 yıl qattı tertipli koloniyada cezasını çekecek.

Arsen Abhayirov Rusiye Ceza kodeksiniñ 205.5 maddesiniñ 1-inci qısımına binaen qabaatlanıp, 13 yılğa azatlıqtan marum etildi. 2 yıl apishanede ve 11 yıl qattı tertipli koloniyada cezasını çekecek.

Eskender Abdulganiyev Rusiye Ceza kodeksiniñ 205.5 maddesiniñ 1-inci qısımına binaen qabaatlanıp, 12 yılğa azatlıqtan marum etildi. 2 yıl apishanede ve 10 yıl qattı tertipli koloniyada cezasını çekecek.

2019 senesi kiçik ayınıñ 14-de Rusiye quvetçileri Qurman rayonındaki Büyük Onlar qasabasında qırımtatarlarnıñ evlerinde kütleviy tintüvler keçirdiler. Neticede Eskender Abdulganiyev, Rustem Emirüseinov ve Arsen Abhayirov yaqalandı. Olarnı Rusiye CK-niñ 205.5 maddesine binaen (Rusiye Federatsiyasınıñ qanunlarına binaen terrorstik olaraq tanılğan teşkilâtnıñ faaliyetinde iştirak etüvde) qabaatladılar.

Aqmescitteki Kıyiv rayon ''mahkemesiniñ'' qararına binaen yaqalanğanlarnıñ episi azatlıqtan marum etildi ve uydurma ve asılsız qabaatlavlar esasında 1,5 yıldan ziyade tevqifhanede tutuldı.

2020 senesi qara qış ayınıñ 9-da Qurmandaki «Hizb ut-Tahrir» davası iştirakçileriniñ qanunsız alda Qırımdan Rostov-na-Donu şeerine avuştırılması aqqında qarar çıqarıldı.

İşbu davanıñ iştirakçileri, qırımtatar faalcileri ve ''Qırım birdemligi'' cemaat birliginiñ azalarıdır.

(1979 senesi doğma) Rustem Emirüseyinov - iş adamı, çağına yetmegen 3 balası bar.

(1987 senesi doğma) Arsen Abhayirov - iş adamı, çağına yetmegen 2 balası bar.

(1997 senesi doğma) Eskender Abdulganiyev - ammal, bekâr.

''Mahkeme olunğanlarnıñ'' episi terrorizm qabaatlavlarını red etip, siyasiy ve diniy sebeblerden taqip etilgenlerini iddia eteler. BM Baş Assambleyası ve Avropa Parlamenti öz qararnamelerinde RF-nı bütün Qırım siyasiy mabuslarını ve olarnıñ arasında işbu davanıñ iştirakçilerini azat etmege defalarca çağırdı.

Qabaatlavlar ''gizli şaatlarnıñ'' şaatlıqlarına ve FSB ile faal işbirlikte bulunğan ekspertlerniñ hulâsalarına esaslana. Faalciler Rusiye Federatsiyasında yasaq etilip, dünyadaki başqa memleketlerniñ ekseriyetinde iç bir türlü şekide sıñırlanmağan «Hizb ut-Tahrir» teşkilâtında iştirak etüvde qabaatlanalar.

''Dava'' esnasında halqara uquq qaba şekilde bozula edi. ''Qabaatlanğanlarnıñ'' serbestlik ve şahsiy toqunmamazlıq aqları, adaletli mahkeme aqları, semereli uquqiy qorçalav aqları, şahsiy ve aileviy ayatlarına ürmet aqları, serbest şekilde fikir etüv, vicdan, din ve baqışlarını serbest ifade etüv aqları muntazam şekilde bozula edi, olar insaniyetsiz ve menliklerini aşalağan davranışqa oğratıla ediler. Bundan ğayrı, işbu ''dava'' çerçivesinde yalıñız qanunğa tayanğan cezalav aqqı bozuldı, çünki IV Jeneva Beyannamesine binaen, işğalci devlet RF öz ceza qanuniyetini işğal etilgen Qırımda işletmege aqqı yoq.

Qırımtatar Maaliy Merkez narazlığını bildirip, işbu üküm qanunsız, siyasiy ve cinaiy olğanını qayd ete.

Böyleliknen Rusiye Federatsiyası işğal etilgen Qırımda farqlı fikirlernen ve insanlarnıñ diniy ve siyasiy dünyabaqışlarınen küreşkenini köstere. Bundan ğayrı, Rostov-na-Donu şeerindeki Cenübiy okrugı arbiy mahkemesiniñ qararı tamır qırımtatar halqına qarşı cezalavlar ve basqınıñ devam etkenini isbatlay.

Rusiye Federatsiyası öz qanuniyetini qanunsız şekilde siyasiy maqsadlarda, şu cümleden qırımtatarlarnıñ zorbalıqsız küreşini ve Qırım işğaline qarşı narazlıqlarını boğmaq içün qullana.

Qırımtatar Maaliy Merkez Qurmandaki «Hizb ut-Tahrir» davasınıñ iştirakçilerine çıqarılğan ükümlerni lâğu etmege ve diger siyasiy mabuslarnı deral azat etmege talap ete.

Qırımtatar Maaliy Merkez Qırımda siyasiy taqip etüvlerni toqtatmaq maqsadınen halqara cemiyetni Rusiye Federatsiyasına basqısını arttırmağa ve Qırım topraqlarında insan aqlarınıñ bozuluvında iştirak etken şahıslarğa qarşı şahsiy sanktsiyalarnı kirsetmege çağıra.

Qırımtatar Maaliy Merkeziniñ matbuat hızmeti

Eskender Bariyevniñ Avropada Havfsızlıq ve İşbirlik Teşkilâtınıñ qoşumca muşaveresinde yapılğan beyanatı

Qırımtatar Maaliy Merkezi idaresiniñ yolbaşçısı, Qırımtatar Milliy Meclisniñ azası Eskender Bariyevniñ Avropada Havfsızlıq ve İşbirlik Teşkilâtınıñ "Söz serbestligi ve onıñ diger temelli serbestliklernen bağı" mevzusındaki insan ölçevi boyunca qoşumca muşaverede yapılğan beyanatı.

23.06.2020

Qırımtatar Maaliy Merkezi Birleşken Milletlerge sürgünlikte qırımtatarlar defin etilgen yerler aqqında malümatnı yolladı

Qırımtatar Maaliy Merkezi Birleşken Milletler tamır halqlarınıñ aqları Ekspert mehanizmine sürgünlikte qırımtatarlar kömülgen yerler aqqında malümatnı yolladı. Şu malümat BM tamır halqları aqlarınıñ beyannamesine köre, ölülerniñ naaşları ve tamır halqlarına ait kutsal ve muqaddes şeylerni yurtlarına qaytaruvına dair maruza azırlanğanda qullanılacaq.

16.04.2020

"İşğalniñ reineleri" sergisi

"İşğalniñ reineleri" sergisi Qırım yarımadası işğal etilgen soñ 20 qırımtatar ailesiniñ yaşayışı aqqında tarif ete. Bu leyhanı Qırımtatar Maaliy Merkezi Ukrainadaki Amerika Birleşken Devletleri elçihanesiniñ demokratiyağa qoltutuv fondunıñ yardımı ile amelge keçirdi.

29.03.2020

"İşğalniñ reineleri" albomı

"İşğalniñ reineleri" albomı Qırım yarımadası işğal etilgen soñ 20 qırımtatar ailesiniñ yaşayışı aqqında tarif ete. Bu leyhanı Qırımtatar Maaliy Merkezi Ukrainadaki Amerika Birleşken Devletleri elçihanesiniñ demokratiyağa qoltutuv fondunıñ yardımı ile amelge keçirdi.

29.03.2020

İnsan aqlarınıñ umumiy beyannamesiniñ qırımtatar tilindeki metni

Bu yıl biz tarihiy bir tedbirge qoşuldıq. İlk kere qırımtatar halqınıñ ve umumen dünya tarihinde esas uquqiy vesiqa qırımtatar tiline tercime etildi. İnsan aqlariniñ umumiy beyannamesiniñ qırımtatar tilindeki metni ilkide Birleşken Milletlerniñ resmiy menbalarında yerleştirildi.

10.12.2019

"Time to free political prisoners of Crimea" risalesi

"Time to free political prisoners of Crimea" risalesinde işğal etilgen Qırımda yaqalanğan ya da apiske alınğan 98 siyasiy mabüs aqqında malümat berile (er siyasiy mabüsniñ resmi, doğğan künü, yaşağan yeri, faaliyeti, yaqalanuv künü ve sebebi, qabaatlav ve cemaat/aqrabalarınıñ qarşılığı ya da siyasiy mabüsniñ mahkemede soñki sözü). Malümat cinaiy "davalarğa" köre tertipke ketirildi.

15.11.2019

"Qırımda işğalciler basqısına oğrağan insanlarnıñ süretleri" sergisi

Qırımtatar Maaliy Merkezi Qırım işğal etilgenden berli elâk ya da ğayıp olğan, apiste siyasiy sebeplerden tutılğan insanlar aqqında sergini azırladı.

23.07.2019

"Bayraqnen birleşkenler - #LIBERATECRIMEA" sergisi

2019 senesi iyunniñ 26-da Hreşçatik soqağındaki Kiyev şeer devlet memuriyetiniñ binası qarşısında "Bayraqnen birleşkenler - #LIBERATECRIMEA" sergisi açıldı. 24 malümat stendinden ibaret olğan sergi qırımtatar milliy bayrağınıñ 28 memleket boyunca seferine bağışlandı.

26.06.2019

Qırımtatar milliy bayraq künü aqqında tanıtma

2019 senesi Qırımtatar Maaliy Merkezi Qırımtatar milliy bayraq künü aqqında tanıtma azırladı. Tanıtmada qırımtatar milliy bayraqnıñ tarihi aqqında tarif etile.

26.06.2019

#LIBERATECRIMEA yazuvlı şiarlarınıñ sergisi

Qırımtatar Maaliy Merkezi, #LIBERATECRIMEA Qırımnı işğalden qurtaruv ve qırımtatar halqı ile birdemlik halqara cemaat areketiniñ yazuvlı şiarlarını taqdim etti. Serginiñ mevzusı Rusiyeniñ Ukrainağa qarşı tecavuzınen bağlı edi.

16.03.2019

"Menim babam – qaraman" risalesi

Bu risale – işğal etilgen Qırımda ğayıp olğan ya da siyasiy sebeplerden apiste tutılğan insanlarnıñ balaları "Menim babam – qaraman" yarışı içün yazğan inşalarnıñ cıyıntığı. Bala yarışı Qırımtatar Maaliy Merkezi ve Qırımtatar Milliy Meclisi teşebbüsinen ötkerildi.

29.10.2018

"Qırım işğal etilgenden berli ğayıp ya da elâk olğan insanlar" risalesi (yañartılğan, ingliz tilinde)

Qırımtatar Maaliy Merkezi yañartılğan, ingliz tilindeki "Qırım işğal etilgeninden berli ğayıp ya da elâk olğan insanlar" risalesini taqdim etti.

30.08.2018

İşğal etilgen Qırımda 2017 senesinde insan aqları bozuvlarınıñ talili (ingliz tilindeki risale)

Risalede işğal etilgen Qırımda 2017 senesinde qayd etilgen insan aqları bozuvlarınıñ deñişip turuvı ve talili taqdim etile.

01.02.2018

"Qırımtatarlar – Qırımnıñ tamır halqı" sergisi

Qırımtatar Maaliy Merkezi, Estoniyadaki insan aqları institutı ve Ukraina İnformatsion siyaseti nazirliginen beraberlikte qırımtatar halqınıñ tarihi mevzusındaki sergini azırladı. Sergi Estoniya Tış işler nazirliginiñ yardımınen ötkerildi.

18.07.2017

"Qırım işğal etilgenden berli ğayıp ya da elâk olğan insanlar" risalesi (qısqadan)

Qırımtatar Maaliy Merkezi "Qırım işğal etilgenden berli ğayıp ya da elâk olğan insanlar" risalesiniñ qısqa şeklini azırladı.

10.06.2017

"Qırım işğal etilgenden berli ğayıp ya da elâk olğan insanlar" risalesi

Qırımtatar Maaliy Merkezi Avropa demokratiya fondunıñ yardımı ile "Qırım işğal etilgenden berli ğayıp ya da elâk olğan insanlar" risalesini işlep çıqardı. Er insannıñ doğğan künü, yaşağan yeri, faaliyeti, ğayıp oluv ya da ölüm künü ve allarına dair malümat berile.

09.06.2017