Qırımtatar Maaliy Merkezi

BİZİM AQQIMIZDA

Qırımtatar Maaliy Merkezi  - qırımtatarlarnıñ siyasiy ve içtimaiy faalligi seviyesini yükseltmek, qırımtatar halqınıñ aqları ve serbestligi qorçalanmasına, qırımtatarlarnıñ milliy özgünliginiñ saqlanıp qalmasına, qırımtatar medeniyetiniñ ilerilemeseine  qoltutmaq maqsadınen meydanğa ketirilgen cemaat teşkilâtı.

Bizim faaliyetimiz qırımtatarlarğa öz aq-uquqları ve serbestligini qorçalav, bunıñ kibi de yarımadanı Ukraina erkânına qaytaruv, Ukrainadaki qanunâratıcılıq ceryanlarına tesir etüv, medeniyet ve ananelerini saqlap qaluv, Ukraina qıta qısmınıñ sakinlerinen dialog ve bağ tutuv areketlerinde vatandaşlıq ve siyasiy faallikniñ aletlerini taqdim etüvden ibaret.

Ögümizge aşağıdaki vazifelerni qoyamız:

• Ukraina devlet akimiyeti institutlarınen iş alıp barmaq;

• qanun ve normativ uquqiy aktlarnı talil etmek ve işlemek ;

• Qırımtatar halqı Meclisine informatsion, konsultativ ve teşkiliy yardım köstermek;

• çeşit-türlü teşebbüsiy leyhalarnı işlemek ve olarnı amelge keçirmek içün donorlarnı qıdırmaq;

• uquqqoruyıcı, yurist ve cemaat faalleri, hususan işğal altındaki territoriyadan kelgen ve mecburen köçken yaş qırımtatarlar içün muntazam oquv ceryanlarını teşkil etmek;

• işğal altındaki territoriya sakinlerini olarnıñ aqları ve imkânlarından haberdar etmek(onlayn konsultatsiyalar, qılavuz ve oquv qullanmalarnı neşir etmek, seminarlar keçirmek ve saire.);

• işğal altındaki territoriyadan kelgen ve mecburen köçken qırımtatarlar içün "qızğın yolaq" ve  yuridik konsultatsiyalarnı teşkil etmek, olarğa advokat ve memuriy hızmet köstermek;

• işğal altındaki territoriyadan kelgen ve mecburen köçken qırımtatarlar içün psihologik tedaviyni teşkil etmek;

• qırımtatarlarnıñ milliy özgünligini saqlap qalmaq ve qırımtatar medeniyetini kütleviyleştirmek.

Biz çeşit teşkilâtlar ve faal insanlarnen işbirlik yapmağa azırmız.